د لوړو زده کړو سرپرست وزیر په خپل کاري دفتر کې د پاکستان له سرپرست سفیر سره وکتل

د لوړو زده کړو سرپرست وزیر شیخ الحدیث مولوي نداء محمد ندیم صاحب او د پاکستان سرپرست سفیر محمد جنید وزیر ترمنځ تعارفي ناسته وشوه، په یاده ناسته کې د لوړو زده کړو سرپرست وزیر د افغانستان او پاکستان پر تاریخي او فرهنګي اړیکو خبرې وکړي او زیاته یې کړه چې افغانستان او پاکستان هغه دوه ګاونډي هېوادونه دي چې له دیني او کلتوري پلوه ډېر مشترکات لري. نوموړي د دواړو هېوادونو تر منځ پر ښو تحصیلي اړیکو او له یو بل سره د علمي او څېړنیزو تجربو پر شریکولو ټینګار وکړ.
دغه راز د لوړو زده کړو سرپرست وزیر د پاکستان له سرپرست سفیر څخه وغوښتل، چې په دغه هېواد کې د افغان محصلینو ستونزې حل، د دواړو هېوادونو ترمنځ د هوکړه لیکونو بیا نوي کېدل او لا ډېرو افغان محصلینو ته د بورسونو د ورکړې په برخه کې همکاري وکړي .
همدارنګه په کابل کې د پاکستان سرپرست سفیر محمد جنید وزیر په پاکستان کې د افغان محصلینو د ستونزو د حل او د دواړو هېوادونو ترمنځ د عملي او اکاډمیکو اړیکو ډاډ ورکړ.
د یادولو وړ ده چې په دغه لیدنه کې دواړو اړخونو پر غوره تحصیلي اړیکو، د محصلینو د وېزو په برخه کې د اسانتیاوو رامنځته کولو او د علمي تجربو پر شریکولو خبرې وکړې.
نن ورځ چهارشنبه ١٤/٩/١٤٤٤

په کابل پوهنتون کې د مرکزي تحصیلي بنسټونو د استادانو لپاره دری ورځنی دیني ـ علمي سمینار د ا.ا.ا د لوړ پوړو چارواکو په ګډون سره پیل شو.

په یاد سمینار کې د ریاست الوزرا اداري مرستیال مولوي عبدالسلام حنفي د یاد سمینار له جوړوونکو څخه د مننې تر څنګ، په ټولنه کې د استادانو د ارزښت او د ځوانانو په روزنه کې یې پر رول خبرې وکړې.

نوموړي زیاته کړه: «هغه ټولنه له ستونزو ځان نه شي رایستلی، چې خپل ارزښتونه هېر کړي، یوازې استادان کولی شي چې ټولنه وژغوري، د هېواد بچیان سمې او د اسلام مقدس دین لارې ته رهنمایي کړي.»

دغه راز د ریاست الوزرا اداري مرستیال د هېواد څلور لسیزو جګړو ته په اشارې سره وویل چې د تپل شوو جګړو پر مهال مو د بنسټیزو برخو تر څنګ، عالمان او علمي او تحصیلي مرکزونه هم له منځه تللي دي.

ښاغلي حنفي د تحصیلي نصاب پر معیاري کولو او پراختیا ټینګار وکړ او ژمنه یې وکړه چې د ا.ا.ا خپلو امکاناتو په کتو د ځان بسیا افغانستان په موخه د هېواد د تحصیلي نظام د ځواکمنتیا په برخه کې به هېڅ ډول مرسته او همکاري ونه سپموي.

وروسته د لوړو زده کړو سرپرست وزیر شیخ الحدیث مولوي نداء محمد ندیم صاحب د یاد سمینار د موخې په اړه خبرې وکړې او ویې ویل: «د دې سمینار موخه له استادانو سره د مذاکرې او مباحثې پیل دی، تر څو د هېواد د تحصیلي نظام د خدمت لپاره د یو بل له دیني او اسلامي فکر څخه، چې د ټولو غوښتنه ده، ګټه واخلو.»

نوموړي زیاته کړه چې د ا.ا.ا د دیني او ملي ارزښتونو په رڼا کې د ځوانانو تعلیم او تحصیل ته ژمن دی. دغه راز ویې ویل چې د دې ډول سمینارونو لړۍ به د ولایتونو تحصیلي بنسټونه ته هم وغځیږي.

د لوړو زده کړو وزارت علمي معین دوکتور لطف الله خیرخواه په نړۍ کې حاکم حالت ته په اشارې سره، د اوسني انسان د عقایدو او فکر او همدارنګه د یوه مسلمان د مهمو قضیو په اړه، چې فکري لومړیتوب یې جوړوي، خبرې وکړې.

همدارنګه په دغه سمینار کې د ا.ا.ا ویاند ذبیح الله مجاهد د ا.ا.ا مطبوعاتي پالیسۍ په اړه خبرې وکړې او ویې ویل چې اسلامي امارت له بې طرفه او هغو رسنیو ملاتړ کوي، چې د خلکو ستونزې تر مسؤلینو رسوي او له خلکو سره د نظام فعالیتونه شریکوي.

نوموړي د رسنیو د مکلفیت په اړه وویل چې رسنۍ هم مکلفې دي چې خپله بې طرفي وساتي، له قانون او ټاکل شوي چوکاټ سره سم او د ملي او دیني ارزښتونو په پام کې نیولو سره خپلو چارو ته دوام ورکړي.

وروسته د دیني تخصصاتو استاد مفتي محمود ذاکري د ټولنې په جوړښت کې د ښه نیت او اخلاص اغېز او د دیني جامعاتو او تخصصاتو رئیس شیخ عبدالمالک نیازي د بریالي استاد د صفاتو او وظیفوي امانتدارۍ په اړه خبرې وکړې.

د یادولو وړ ده دغه سمینار به سبا او بل سبا هم دوام وکړي او ګډونوال به پر مختلفو موضوعاتو خبرې پکې وکړي.
نېټه: یکشنبه
۱۴۴۴/۷/۲۱هـ.ق ۱۴۰۱/۱۱/۲۳هـ.ش ۲۰۲۳/۲/۱۲

د هېواد تحصیلي بنسټونو د جیولوجي او کانونو، ځمک پېژندنې او چاپېریال ساتنې پوهنځيو د تحصیلي نصاب د بیاکتنې او پراختیا دویم پړاو کلسټر پیل شو.

د یاد کسټر په پرانیسته کې د لوړو زده کړو وزارت علمي معین دوکتور لطف الله خیرخواه کانونه د افغانستان د اقتصادي پراختیا یوه غوره لار وبلله او زیاته یې کړه چې تجربي علوم زموږ د ټولنې جدي اړتیا ده.

دغه راز د لوړو زده کړو وزارت علمي معین له کایناتو سره د انسان تړاو ته په اشارې سره وویل چې الله تعالی موږ ته امر کړی چې له کایناتو څخه په سم ډول ګټه واخلو او ښه یې وپالو.

وروسته د لوړو زده کړو وزارت د تحصیلي نصاب رئیس مفتي عبدالرؤف فراهي د یاد کلسټر په اړه معلومات ورکړل او د کلسټر له ګډونوالو یې وغوښتل چې په دې پړاو کې د یادو پوهنځيو مفردات تکمیل او ټاکلو شویو موخو ته ځان ورسوي.

د یادولو وړ ده چې د دې کلسټر لپاره د هېواد د دولتي او خصوصي تحصیلي بنسټونو سربېره د مختلفو ادارو متخصصین هم رابلل شوي، چې د پنځو کاري ورځو په جریان کې به د یاو پوهنځو پر تحصیلي نصابونو تخصصي بحثونه وکړي.

نېټه: یکشنبه
۱۴۴۴/۷/۷هـ.ق ۱۴۰۱/۱۱/۹هـ.ش ۲۰۲۳/۱/۲۹م

د لوړو زده کړو وزارت مالي او اداري معین په خپل کاري دفتر کې د پلټنې عالي ادارې پلاوي سره چې ټاکل شوې د دې وزارت ځینو برخو پلټنه وکړي، لیدنه وکړه.
په دې لیدنه کې د لوړو زده کړو وزارت مرکزي ادارو ځينو رئيسانو او د پلټنې عالي ادارې پلاوی چې له رئیسانو، آمرینو او مفتشینو څخه جوړ و، برخه اخیستې وه.
په پیل کې مولوي حافظ محمد حسیب حامد د لوړو زده کړو مالي او اداري معین د لوړو زده کړو وزارت کړنو او پروګرامونو په اړه معلومات وړاندې کړل او زياته يې کړه چې د دې وزارت ټولې کاري چارې د قوانینو او مقرراتو پر اساس په صداقت سره پر مخ ځي.
د لوړو زده کړو مالي او اداري معین وویل چې د وزارت ټول کارکوونکي او مسئولین د پلټنې عالي ادارې له پلټونکو سره مرسته کوي او د اړتیا په وخت کې هر څه ته چې اړتیا لري په واک کې يې ورکوي.
وروسته د پلټنې عالي ادارې ځینو غړو د خپلې ادارې د موخو او کاري پروسې په اړه معلومات وړاندې کړل او ویې ویل چې د دولتي ادارو له پلټنې څخه موخه د ادارو له مسئولینو سره مرسته او همکاري ده تر څو خپلې ټاکل شوې موخې ترلاسه او په مالي، اداري، زیربنا او نورو برخو کې خپلې ستونزې حل کړي.
په پای کې مالي او اداري معین د وزارت ټولو مسئولینو څخه وغوښتل تر څو د پلټنې ادارې له ټیم سره مرسته اوهمکاري وکړي او د پلټنې ادارې پلاوي ته یې ډاډ ورکړ چې دی به په خپله له پروسې څخه څارنه وکړي.
شنبه مورخ : ۶/۷/۱۴۴۴ هـ ق ۸/۱۱/۱۴۰۱ هـ ش ۲۸/۱/۲۰۲۳ م

د لوړو زده کړو وزارت د رهبري شورا ناسته، د دغه وزارت سرپرست وزیر شیخ الحدیث مولوي نداء محمد ندیم صاحب په مشرۍ تر سره شوه.

د ناستې په پیل کې د لوړو زده کړو سرپرست وزیر وویل چې په سرد سېرو ولایتونو کې مو له ژمنیو رخصتیو په استفادې د پوهنتونونو د هغو اړتیاوو پوره کولو او ستونزو پر حل کار وکړ، چې مخکې مو د سفرونو پر مهال په نښه کړې وې.

دغه راز د لوړو زده کړو سرپرست وزیر د وزارت ټولو مسؤلینو ته سپارښتنه وکړه چې د هېواد د تحصیلي بهیر د غوره والي په موخه خپلو چارو او ارزونې ته لا زیات متوجه شي.

همدارنګه د تېرو شوراګانو پرېکړو ته لنډه کتنه وشوه او د اړوندو کمېټو راپورونه واورېدل شول.

وروسته له اجنډا سره سم د دولتي دیني جامعاتو د کادري غړو د علمي رتبې د طرزالعمل تثبیت او اجرا، د تخصصاتو ریاست د بودیجې استقلالیت، د تحصیلي مشورتي شرکتونو د طرزالعمل پر طرحې، د خصوصي تحصیلي بنسټونو د ۱۴۰۲هـ.ش کال د بهاري سیمسټر کانکور ازموینې او نورو اړوندو موضوعاتو په اړه هر اړخیز بحثونه او لازمې پرېکړې وشوې.

نېټه: چهارشنبه
۱۴۴۴/۷/۳هـ.ق ۱۴۰۱/۱۱/۵هـ.ش ۲۰۲۳/۱/۲۵م

About

د افغانستان اسلامي امارت د لوړو زده کړو وزارت رسمي صفحه