د رویټرز خبري اژانس د راپور له‌مخې، پر غزه د اسراییلي اشغالګرو په تازه بریدونو کې ۳۵ فلسطینیان شهیدان او لسګونه نور ټپیان شوي دي.

په قربانیانو کې ۲۵ هغه فلسطینیان دي، چې د مرستو تر لاسه کولو لپاره راغونډ شوي وو.

دغه بریدونه داسې مهال کېږي، چې غزه کې روان بشري ناورین ورځ تر بلې زیاتېږي.
#ملي‌تلویزیون

د افغانستان اسلامي امارت د بهرنيو چارو وزير مولوي اميرخان متقي د يوه پلاوي په مشرۍ چين ته سفر کړی.

بهرنیو چارو وزارت وایي، چې ښاغلی متقي به په دې سفر کې له خپل چينايي سيال وانګ‌يي سره د دوو اړخيزو سیاسي، اقتصادي او سوداګریزو اړيکو په اړه د خبرو ترڅنګ، د چين او پاکستان د بهرنيو چارو له وزيرانو سره په ګډ‌ه ناسته کې هم ګډون وکړي.
#ملي‌تلویزیون

د پنجشېر ولایت مقام ویاند سیف‌الدین لټون وایي، چې له بدخشان او نورستان ولایتونو سره د دې ولایت د نښلېدونکو سړکونو د جوړولو چارې ۸۰ سلنه بشپړې شوې دي.

د ښاغلي لټون په وینا، د پنجشیر–بدخشان سړک، چې ۲۱۰ کیلومتره اوږدوالی لري، تر دې دمه ۱۴۸ کیلومتره بشپړ شوی او د پنجشیر–نورستان سړک چارې هم یوازې ۲۲ کیلومتره پاتې دي.

د پنجشیر د ولایت ویاند زیاته کړې چې د پنجشیر–تخار سړک د ابتدایي سروې چارې هم پیل شوې دي.
#ملي‌تلویزیون

د افغانستان اسلامي امارت بهرنیو چارو وزارت، مشهد کې د افغانستان جنرال قونسل فیضان‌الله ناصري په مړینه خواشیني ښودلې او ویلي یې دي، چې نوموړي اسلامي امارت لپاره صادقانه او ارزښتناکه خدمتونه ترسره کړي دي.

یاد وزارت د ښاغلي ناصري کورنۍ ته د صبر او اجر غوښتنه کړې او زیاته کړې یې ده، چې نوموړی نن له غرمې مخکې د زړه د ناروغۍ له امله په حق ورسېد.
#ملي‌تلویزیون

د اسیا پراختیایي بانک عمومي رییس دیوید هیل د اوبو او انرژۍ له وزیر ملا عبداللطیف منصور سره کتلي.

د اوبو او انرژۍ وزارت وایي، چې ښاغلي هیل په دې کتنه کې افغانستان کې د نیمګړو او نوي پروژو د پلي کېدو په برخه کې د همکارۍ د بیا پیل ژمنه کړې ده.

ښاغلي منصور د کابل–پنجشېر د اوبو لېږد، د شاه‌توت بند، او د دهلې بند د پراختیا پروژو لپاره د بانک همکاري مهمه بللې او د دوام غوښتنه یې کړې ده.
#ملي‌تلویزیون